Targë Provë

“Targa provë” quhen targat që i vihen nga mbrapa mjeteve në qarkullim provë, për të cilat flitet në pikën 1, të nenit 97 të Kodit Rrugor të Republikës së Shqipërisë, i ndryshuar.

“Autorizim për qarkullim provë” është dokumenti me të cilin pajisen mjetet që qarkullojnë për prova teknike, eksperimentale, konstruktive ose transferime për arsye shitje e kolaudime.

“Libër lëvizje” është dokumenti në të cilin evidentohet itinerari i lëvizjes, data e lëvizjes dhe të dhënat e mjetit për çdo qarkullim provë.

Aplikim për Targë Provë

Kriteret për pajisjen e subjekteve tregtare me targë provë si dhe sasia e tyre për çdo subjekt

Mund të pajisen dhe përdorin targën PROVË, subjektet tregtare të cilat përmbushin kriteret e mëposhtme:

Subjektet e regjistruara në regjistrin tregtar të QKB dhe që kanë si objekt të aktivitetit “Blerja, shitja e mjeteve me motor dhe rimorkio”, që janë të pajisur me Licencën me kodin VII.3.B.1/d, të lëshuar nga QKB-ja, dhe që kanë autorizim të vlefshëm nga prodhuesi për mjetet e reja, mund të pajisen dhe përdorin deri në 5 targa provë.
Subjektet e regjistruara në regjistrin tregtar të QKB, që kanë si objekt të aktivitetit “Blerja, shitja e mjeteve me motor dhe rimorkio”, që janë të pajisur me Licencë, të vlefshme, me kodin VII.3.B.1/d, të lëshuar nga QKB, mund të pajisen dhe përdorin deri në 2 targa provë.
Subjektet e regjistruara në regjistrin tregtar të QKB, dhe që janë të pajisura me Licencë me të paktën njërin nga kodet VII.3.B.1/a, b, c, të vlefshme, të lëshuar nga QKB, mund të pajisen dhe përdorin vetem 1 targë provë.
Subjektet e regjistruara në regjistrin tregtar të QKB që kanë si objekt të aktivitetit “Blerja, shitja e mjeteve me motor dhe rimorkio”, të cilat kanë një aplikim të vlefshëm, pranë QKB, për t’u pajisur me Licencë me kodin VII.3.B.1/d, mund të pajisen dhe përdorin vetëm 1 targë provë.

Me aplikimin, për t’u pajisur me Licencë me kodin VII.3.B.1/d pranë QKB, do ti miratohet pajisja me targë provë vetëm një herë.

Kriteret e mësipërme aplikohen dhe kur subjekte tregëtare kërkojnë të pajisen me targë PROVË për motomjete.

Subjektet e regjistruara në regjistrin tregtar me objekt të veprimtarisë shitblerje e mjeteve rrugore, dhe që kanë një adresë të dytë veprimtarie, me juridiksion të ndryshëm nga juridiksioni që mbulon adresën kryesore, pajisen me 1 targë provë për secilën adresë.

Shërbimet që lidhen me targën PROVË

1. Shërbimet, për të cilat kërkohet aplikim në faqen web të DPSHTRR, janë:

pajisja për herë të parë me targën provë,
rinovimi i vlefshmërisë së autorizimit dhe librit të lëvizjes për targën provë,
pajisja me targë të re provë, për arsye të humbjes, vjedhjes ose shkatërrimit të targës së mëparshme,
pajisja me autorizim dhe libër lëvizje të ri për arsye të humbjes, vjedhjes ose shkatërrimit të atyre të mëparshme.

Në kërkesën nëpërmjet aplikimit në faqen zyrtare të DPSHTRr-së, në “Shërbime Online /Aplikime Online”, plotësohen fushat sipas formës në aplikim dhe ngarkohen sipas rastit, dokumentat e mëposhtëm:

ekstraktin e regjistrit tregtar, të lëshuar nga QKB,
licencën me kodin VII.3.B.1/d, të vlefshme, të lëshuar nga QKB dhe autorizim nga prodhuesi i mjeteve, kur kërkon të pajiset deri në 5 targa provë,
licencën me kodin VII.3.B.1/d, të vlefshme të lëshuar nga QKB, kur kërkon të pajiset deri në 2 targa provë,
licencën me kodin VII.3.B.1/a, b, c, të vlefshme, të lëshuar nga QKB, kur kërkon të pajiset me 1 targë provë,
aplikim të vlefshëm, në QKB, për pajisjen me Licencë me kodin VII.3.B.1/d, kur kërkon të pajiset deri në 1 targë provë,
vërtetimin e denoncimit të lëshuar nga policia e shtetit, në rastet e humbjes, vjedhjes, shkatërrimit të targës ose autorizimit dhe librit të lëvizjes.

Pas Miratimit të kërkesës, administratori i subjektit ose i autorizuari prej tij, paraqiten në drejtorinë rajonale që ka nën juridiksion adresën e subjektit, për të vazhduar me shërbimin për marrjen e targës PROV, autorizimit dhe librit të lëvizjes.

2. Shërbimet, për të cilat nuk kërkohet aplikim fillestar, janë:

pajisje me libër të ri lëvizjeje për arsye të mbarimit të hapsirave të plotësimit të librit të mëparshëm,
riprodhim i të njëjtës targë PROV, për arsye të dëmtimit të asaj ekzistuese.

Për këto shërbime, administratori i subjektit ose i autorizuari prej tij, paraqiten në drejtorinë rajonale që ka nën juridiksion adresën e subjektit, për të marrë shërbimin e kërkuar.

KUJDES!

Për subjektet të cilat, përpara datës 25.06.2026, janë pajisur me targë prove në bazë të objektit të aktivitetit “Blerja, shitja e mjeteve me motor dhe rimorkio”, por që nuk disponojnë licencën me kodin VII.3.B.1/d, rinovimi i autorizimit dhe pajisja me libër lëvizjeje, përfshirë rastet e përfundimit të afatit të vlefshmërisë, humbjes, vjedhjes apo shkatërrimit, do të lejohen vetëm një herë, me kusht paraqitjen e një aplikimi të vlefshëm pranë QKB-së për pajisjen me licencën VII.3.B.1/d.

Në rinovimin pasardhës, subjekti duhet të disponojë detyrimisht licencën me kodin VII.3.B.1/d, pasi vetëm aplikimi për pajisje me licencë nuk do të konsiderohet i mjaftueshëm.