Tahografi

Baza ligjore:

• Ligj Nr. 9514 datë 18.04.2006 për aderimin e Republikës së Shqipërisë në marrëveshjen europiane “Për punën e ekuipazheve të mjeteve të përfshira në transportin ndërkombëtar rrugor (AETR) dhe në protokollin e nënshkrimit e në amendamentin Nr. 4 të saj”.
• Vendim i Këshillit të Ministrave Nr. 1054 datë 22.12.2010 për miratimin e rregullores “Për pajisjet e regjistrimit në transportin rrugor”.
• Vendim i Këshillit të Ministrave Nr. 1243 datë 10.09.2008 “Mbi miratimin e rregullores për organizimin e kohës së punës të personave që kryejnë transport rrugor, për orët e drejtuesve të mjeteve dhe pajisjet e regjistrimit”.
• Udhëzimi Nr. 4 datë 27.05.2014 “Mbi kërkesat teknike dhe standardet e operimit të ofiçinës (Qendrës Teknike) së autorizuar të Tahografit”, i ndryshuar.

Qendrat Teknike në Drejtoritë Rajonale të Shërbimeve të Transportit Rrugor Durrës, Vlorë, Gjirokastër dhe Fier, kryejnë aktivizimin, instalimin, inspektimin dhe kalibrimin e Tahografit Analog dhe Digjital.

Titullari i Qendrës Teknike të miratuar aplikon pranë Drejtorisë Rajonale të Shërbimeve të Transportit Rrugor në të cilën përfshihet, për lëshimin e kartës së memories së drejtuesit teknik dhe teknikëve të certifikuar.

Dokumentacioni i nevojshëm:

• Kërkesë, autorizim për miratimin e qendrës teknike ose rinovimin e dokumentit të noterizuar - nga Titullari i Qendrës Teknike.
• Certifikatë e trajnimit për drejtuesin teknik dhe teknikët e certifikuar.
• Fotokopje e kartës së identitetit.
• Fotografi (2 copë).
• Mandat pagesë 100 Euro.

Aplikuesi i cili kërkon të pajiset me Kartë Tahografi Digjital për të gjitha llojet duhet të paraqitet pranë DRSHTRR që përfshin vendbanimin e tij, shoqëruar me dokumentat e lartpërmendura.

Afatet kohore, rinovimi dhe zëvendësimi i kartave:

Kartat e Tahografit Digjital për drejtues mjeti, shoqërie, për kontrollor nominal si dhe për kontrollor në grup, jepen me afat 5-vjeçar. Periudha e vlefshmërisë administrative të Kartës për Ofiçinat dhe Teknikun e Autorizuar ka afat 1-vjeçar.

Zëvëndësimi bëhet:

• në rast dëmtimi ose mosfunksionimi - kundrejt pagesës dhe ka afat vlefshmërie të njëjtë nëse bëhet deri në 3 muaj para afatit të skadencës.
• në rast humbje ose vjedhje - kundrejt pagesës dhe ka afat vlefshmërie të njëjtë nëse bëhet deri në 3 muaj para afatit të skadencës, pas denoncimit pranë autoriteteve kompetente nga mbajtësi i kartës.

Kushtet që duhet të plotësojë mjeti përpara kryerjes së shërbimit në Qendrën Teknike Tahograf:

• mjeti është i pangarkuar dhe në kushte normale operimi,
• gomat janë në përputhje me rregulloret e konstruksionit dhe përdorimit në zbatim të thellësisë së sipërfaqes së gomës,
• gomat janë fryrë sipas presionit të rekomanduar nga prodhuesi i mjetit,
• ofiçina nuk operon në mjetet që, gjatë kontrollit paraprak konstatohen me ndërhyrje të paligjshme në sistemin e pajisjes së kontrollit (Tahografit),
• teknikët e ofiçinës nuk janë të detyruar të punojnë mbi mjete që sipas mendimit të tyre, duken të jenë të pasigurt.

Tahografët Analog

Procedurat:

• instalimi i pajisjes së regjistrimit,
• vulosja,
• kontrollet dhe inspektimet,
• inspektimi periodik 2-vjeçar,
• procedura e inspektimit 6-vjeçare.

Tarifat maksimale për operacionet që kryhen nga ofiçinat e autorizuara të tahografit:

• e kalibrimit - 8 500 Lekë,
• e inspektimit me afat 2-vjeçar - 6 500 Lekë,
• e inspektimit me afat 6-vjeçar - 7 800 Lekë.

Tahografët Digjital

Procedurat:

• instalimi,
• aktivizimi,
• kalibrimi,
• inspektimi periodik,
• transferimi i të dhënave,
• lëshimi i certifikatës së mos transferimit të të dhënave.

Tarifat maksimale për operacionet që kryhen nga ofiçinat e autorizuara të tahografit:

• e kalibrimit - 8 500 Lekë,
• e inspektimit me afat 2-vjeçar - 6 500 Lekë,
• për heqjen e pajisjes së regjistrimit - 7 800 Lekë.

Tarifat e mësipërme për të dyja kategoritë përfshijnë instalimin e pllakës dhe vulosjen.