Pajisja me Leje Drejtimi për Kategorinë AM

Kushtet për marrjen e lejes së drejtimit – Kategoria AM

Mosha minimale : 16 vjeç.
Afati maksimal i vlefshmërisë : 15 vjet. Për personat mbi 70 vjeç, konfirmohetme certifikatë mjekësore sipas nenit 117 të Kodit Rrugor.

Procedura:

Regjistrimi në një autoshkollë të licencuar;
Ndjekja e programit të miratuar;
Marrja e lejes së drejtimit bëhet me provim teorie dhe provë praktike.

Mjetet që mund të drejtohen

Kateg.	Lloji i mjetit	Numri i rrotave	Shpejtësia maksimale	Cilindrata (cc)	Fuqia (kW)	Masa bosh	Shënime
L1	Ciklomotor	2 rrota	>25 km/h dhe ≤45 km/h	≤50 cm³ (motor me djegie të brendshme)	≤4 kW (motor elektrik)	-	-
L2	Mjet me tri rrota	3 rrota	>25 km/h dhe ≤45 km/h	≤50 cm³ (me ndezje të komanduar)	≤4 kW (motorë të tjerë me djegie të brendshme ose elektrik)	-	-
L6	Mjet me katër rrota të lehta	4 rrota	>25 km/h dhe ≤45 km/h	≤50 cm³ (me ndezje të komanduar)	≤4 kW (motorë të tjerë me djegie të brendshme ose elektrik)	≤350 kg (pa bateri për EV)	Përfshin kuadracikla të lehta

Regjistrimi për përgatitjen teorike dhe provimin e teorisë

Për regjistrimin e kandidatit për përgatitjen teorike dhe për provimin e teorisë ndiqen këto hapa:

Paraqitja e dokumentacionit

Përfaqësuesi ligjor i autoshkollës paraqitet pranë DRSHTRR-së përkatëse dhe dorëzon dokumentet për regjistrim të kandidatit si vijon:

kërkesën për kryerje shërbimi;
fotokopje të dokumentit të vlefshëm të identifikimit (kartë identiteti; për shtetasit e huaj: pasaportë e përkthyer e njehsuar nga noteri dhe leje qëndrimi të vlefshme të njehsuar nga noteri);
Certifikatë mjekësore për drejtues mjeti, me fotografi, të lëshuar jo më përpara se gjashtë muaj nga data e paraqitjes së kërkesës;
faturën e fiskalizuar që autoshkolla i ka lëshuar kandidatit.

Pagesa e shërbimit - 2,000 lekë.

DRSHTRR, lëshon “LEJE” mod. DD/TAM për regjistrim të kandidatit dhe për provën e teorisë, me afat vlefshmërie 6 muaj.

Pagesa e riprovimit - 1,200 lekë.

Pagesa e riprovimit nuk kryhet në momentin e dorëzimit të dokumentacionit fillestar. Ajo aplikohet në rast riprovimi.

Provimi i teorisë

Provimi i teorisë është i informatizuar dhe zhvillohet si vijon:

Numri i pyetjeve: 30;
Numri i gabimeve të lejuara: 3;
Koha maksimale: 30 minuta.

Dokumentet që duhet të paraqesë kandidati janë:

dokument identifikimi të vlefshëm (kartë identiteti; për shtetasit e huaj: pasaportë e përkthyer e njehsuar nga noteri dhe leje qëndrimi të vlefshme të njehsuar nga noteri);
“LEJE”, modeli DD/TAM, të vlefshme (lejohet deri në 5 teste, minimumi 5 ditë ndërmjet testeve);
dëshmi për kryerjen e kursit të ndihmës së shpejtë, të lëshuar nga Kryqi i Kuq Shqiptar, vetëm në rastet e pajisjes me leje drejtimi për herë të parë.

Përjashtime

Përjashtohen nga kryerja e kursit të trajnimit për dhënien e ndihmës së shpejtë mjekësore në rast aksidenti rrugor personat që kanë përfunduar studimet e larta në degët mjekësi ose infermieri. Në këto raste kërkohet fotokopje e diplomës, e nënshkruar nga urdhri përkatës.

Lehtësira për personat me aftësi të kufizuara

Personat me aftësi të kufizuara në dëgjim, që plotësojnë kushtet e përcaktuara në nenin 306 të VKM-së nr. 153, datë 7.4.2000, të ndryshuar, kanë të drejtë që në provimin e teorisë të marrin me vete një interpretues të gjuhës së shenjave shqipe, të certifikuar nga autoriteti përkatës.

Provimi i teorisë zhvillohet me aparat komunikimi audio për personat që kanë kufizime në leximin e gjuhës së shkruar.

Regjistrimi për përgatitjen praktike dhe për provën e aftësive drejtuese e të sjelljes (prova praktike)

Paraqitja e dokumentacionit

Përfaqësuesi ligjor i autoshkollës paraqitet pranë DPSHTRR dhe dorëzon:

fotokopje të dokumentit të vlefshëm të identifikimit (kartë identiteti; për shtetasit e huaj: pasaportë e përkthyer e njehsuar nga noteri dhe leje qëndrimi të vlefshme të njehsuar nga noteri);
faturën e fiskalizuar që autoshkolla i ka lëshuar kandidatit për shërbimin.

Pagesa e shërbimit – 2,800 lekë.

DRSHTRR, lëshon “AUTORIZIM” model DD/P për regjistrim të kandidatit dhe për provën e praktikës, me afat vlefshmërie 6 muaj.

Pagesa e riprovimit – 2,200 lekë.

Pagesa e riprovimit nuk kryhet në momentin e dorëzimit të dokumentacionit fillestar. Ajo aplikohet në rast riprovimi.

Prova e aftësive drejtuese e të sjelljes (prova praktike)

Kandidati paraqitet pranë komisionit përkatës të marrjes në prova së bashku me instruktorin e praktikës dhe me mjetin e marrjes në prova me dokumentet:

fotokopje të dokumentit të vlefshëm të identifikimit (kartë identiteti; për shtetasit e huaj: pasaportë e përkthyer e njehsuar nga noteri dhe leje qëndrimi të vlefshme të njehsuar nga noteri);
“AUTORIZIM” model DD/P të vlefshëm (lejohet deri në 5 prova, minimumi 5 ditë ndërmjet provave).