Hapja e një Autoshkolle

Kushtet dhe kriteret për hapjen e një autoshkolle

Informohu për kushtet teknike dhe profesionale për fillimin e veprimtarisë së një autoshkolle, pajisjen me Vendim Miratues nga DPSHTRR, si dhe raportin e numrit të popullsisë për hapjen e autoshkollave në nivel qarku sipas të dhënave të INSTAT.

Për fillimin e veprimtarisë së një autoshkolle për herë të parë, subjekti duhet të pajiset me Vendim Miratues nga DPSHTRR, pasi të jetë pajisur më parë me licencën VII.3.A.1 “Autoshkollë” nga QKB.

Kushti për hapjen e autoshkollës

Vendimi miratues jepet vetëm nëse respektohet raporti i numrit të popullsisë për një autoshkollë në nivel qarku, sipas të dhënave zyrtare të INSTAT:

Qarqe me mbi 500,000 banorë → 1 autoshkollë për çdo 15,000 banorë
Qarqe 200,000 – 500,000 banorë → 1 autoshkollë për çdo 12,000 banorë
Qarqe 100,000 – 200,000 banorë → 1 autoshkollë për çdo 10,000 banorë
Qarqe me më pak se 100,000 banorë → 1 autoshkollë për çdo 8,000 banorë

Dokumentacioni për hapjen e një autoshkolle

Informohu për dokumentacionin që duhet të paraqesë subjekti pranë DRSHTRR-së për hapjen e një autoshkolle, përfshirë licencën përkatëse, dokumentet e ambientit, personelin e kualifikuar dhe mjetet e përdorura për përgatitjen teorike dhe praktike të kandidatëve.

Subjekti i interesuar paraqet pranë DRSHTRR-së ku do të ushtrojë aktivitetin, kërkesën për hapjen e autoshkollës dhe dokumentet:

Licencën VII.3.A.1 “Autoshkollë” dhe ekstraktin historik të QKB
Dokument identifikimi të administratorit të licencës
Dokumentet e pronësisë ose kontratën e qirasë për ambientin e autoshkollës dhe planimetrinë e klasës
Kontratën e punës dhe DAP për mësuesin e teorisë (drejtuesin teknik)
Kontratën e punës dhe DAP për instruktorët e praktikës
Lejet e drejtimit të instruktorëve të praktikës
Rregulloren e funksionimit të autoshkollës
Dokumentet e mjeteve në pronësi të subjektit (leje qarkullimi, siguracion, kontroll teknik)
Deklaratën e titullarit që autoshkolla disponon ambientet, pajisjet didaktike dhe regjistrat përkatës

Autoshkolla duhet të ketë të paktën një mësues teorie dhe një instruktor praktike.

Verifikimi dhe lëshimi i Vendimit Miratues për Licencën VII.3.A.1 (Autoshkollë)

Informohu për procedurën e verifikimit të kritereve teknike dhe profesionale të autoshkollës nga DPSHTRR, si dhe për procesin e lëshimit të Vendimit Miratues për fillimin e veprimtarisë.

Pas dorëzimit të dokumentacionit:

DRSHTRR verifikon dokumentacionin dhe e përcjell atë në DPSHTRR.
DPSHTRR shqyrton dokumentet dhe, nëse plotësohen kushtet, organizon verifikimin në ambientet e autoshkollës.
Verifikimi kryhet nga një komision i ngritur me urdhër të Drejtorit të Përgjithshëm të DPSHTRR-së, brenda 30 ditëve nga paraqitja e kërkesës.
Në përfundim të verifikimit vendoset lëshimi ose refuzimi i Vendimit Miratues.

Vendimi Miratues dërgohet në DRSHTRR, ku një kopje i jepet subjektit dhe një kopje administrohet në dosjen e autoshkollës.

Regjistrimi i autoshkollës

Informohu për procedurën e regjistrimit të autoshkollës në sistemin informatik të DPSHTRR-së, si dhe për regjistrimin e personelit dhe mjeteve për t’u përdorur në procesin e përgatitjes teorike dhe praktike dhe për provën e praktikës.

Pas marrjes së Vendimit Miratues:

DRSHTRR regjistron autoshkollën në sistemin informatik të DPSHTRR-së.
Regjistrohen gjithashtu mësuesi i teorisë, instruktorët e praktikës dhe mjetet e autoshkollës.
Vijon procedura për pajisjen e instruktorëve dhe mjeteve me autorizimet përkatëse.