Informacion mbi CAP

You are here

Certifikata e Aftësimit Profesional (CAP), është një kualifikim që vërteton aftësinë profesionale të drejtuesve të mjeteve rrugore që pajisen me leje drejtimi të kategorive C1, C1E, C, CE, D1, D1E, D dhe DE.

Kjo certifikatë lëshohet në përmbushje të detyrimeve që rrjedhin nga Udhëzimi i Ministritrisë së Punëve Publike dhe Transporteve Nr.3606/2, datë 28.10.2011 “Për pajisjen e përdoruesve të mjeteve rrugore të kategorive C1, C1E, C, CE, D1 dhe D1E, D dhe DE, me Certifikatën e Aftësimit Profesional” , i ndryshuar, si dhe në përputhje me kërkesat e direktivave të BE dhe zhvillimet e tregut të transportit rrugor të mallrave dhe udhëtarëve.

Kualifikimi (CAP) si pjesë e dokumentacionit të qarkullimit të mjetit, është i vlefshëm vetëm për përdorimin e mjeteve të përcaktuara në kategoritë e shënuara të cilat në të gjitha rastet duhet të jenë në përputhje me kategoritë e lejes së drejtimit të mbajtësit të saj.

Në të gjitha rastet, kualifikimi CAP, do të lëshohet nga DPSHTRR-të, në varësi të kërkesës dhe lejes së drejtimit dhe janë dy llojesh:

  •  CAP për transportin e mallrave: Për drejtuesit e mjeteve të destinuara për transporte specifike të mallrave me peshë të maksimale të autorizuar mbi 3.5 ton, të pajisur me leje drejtimi të kategorisë C1, C1E, C dhe CE;
  •  CAP për transportin e udhëtarëve: Për drejtuesit e mjeteve të destinuara apo autorizuara për transportin e udhëtarëve dhe nxënësve të shkollave, të pajisur me leje drejtimi të kategorisë D1, D1E, D dhe DE.

Çdo person që zotëron një kualifikim CAP dhe është i pajisur me leje drejtimi të kategorive C1 dhe D1 ose C dhe D, si dhe me ato që pasohen nga shtrirja e tyre, mund të aplikojë për t’u pajisur me të dyja llojet e CAP.

Kjo realizohet pasi të ketë kryer një trajnim periodik të veçantë dhe të jetë shpallur fitues i provimit përkatës teorik.

Duke filluar nga data 19.08.2025, kualifikimi CAP për drejtuesit që përmbushin këto kushte do të pasqyrohet në kartonin e lejes së drejtimit.

Kualifikimi CAP i drejtuesit të mjetit do të pasqyrohet në krah të kategorisë perkatëse poshtë numrit 12, në anën e pasme të lejes së drejtimit me kodin "95" i shoqëruar me datën e vlefshmërisë që vërteton këtë kualifikim.


Shënim: Drejtuesit e mjeteve që e kanë një karton sipas modelit CAP të vlefshëm mund ta përdorin deri në përfundimin e datës së vlefshmërisë që vërteton kualifikimin CAP.