Përdorimi i Mjetit nga të Tretë

Ndryshim i përdorimit të mjetit

Mjeti mund të caktohet për përdorim vetjak ose për të tretë.

Të gjitha mjetet e regjistruara në Republikën e Shqipërisë, duhet të paraqiten brenda 30 ditëve pranë DRSHTRR-së për kryerjen e veprimeve për dhënien në përdorim të të tjerëve.

Përdorimi i mjetit nga të tretë përfshin:

dhënien me qira, pa drejtues mjeti;
dhënien me qira, me drejtues mjeti dhe shërbimi taksi për transport udhëtarësh;
shërbimin e linjës për transport udhëtarësh ose për transport mallrash;
shërbimin e transportit të mallrave për llogari të tretëve;
shërbimin taksi për transportin e mallrave për llogari të tretëve.

Ndryshimi i përdorimit të mjetit pasqyrohet në fushën “Destinacioni dhe Përdorimi” në:

Lejen e qarkullimit;
Certifikatën e pronësisë (nëse nuk është pajisur me lejen e re të qarkullimit).

Ju duhet të paraqiteni pranë sporteleve të shërbimit të Drejtorisë Rajonale ku është i regjistruar mjeti, me këto dokumente me vete:

Dokument identifikimi. Nëse është subjekti fizik ose juridik nevojitet ekstrakti i QKB-së. Personi që kryen veprimet duhet të jetë i pajisur me autorizim dhe mjetin e identifikimit;
Leja e qarkullimit;
Certifikata e pronësisë (nëse nuk jeni pajisur me lejen e re të qarkullimit);
Kontrata e qirasë e noterizuar;
Kontrata e sigurimit të mjetit.